Premier League na Champions League , Europa League,Laliga ndetse n'ibindi bikorwa bya Sport bigiye guhagarara kubera Coronavirus.

Uyu wa kane ushize w’iki cyumweru usize abakinnyi benshi barimo Odoi wa Chelsea n’abatoza nka Arteta wa Arsenal byemejwe ko bamaze kwandura icyorezo cya Coronavirus, bigiye gutuma imikino myinshi ihagarara hirya no hino ku isi.

Arsenal mu ijoro ryo kuri uyu wa kane yemeje ko umutoza mukuru wayo Mikel Arteta yamaze kwandura iki cyorezo,mu gihe kandi kuri uyu wa kane ikipe ya Chelsea nayo yemeje ko rutahizamu wayo Hudson Odoi nawe yanduye Coronavirus.

Ikipe ya Juventus yose yishyize mu kato nyuma y’uko myugariro wayo Danielle Rugani yanduye Coronavirus, shampiyona ya Espagne bahisemo kuyihagarika, n’imikino myinshi hirya no hino ku isi yagezweho.

Mu Bwongereza kugeza kuri uyu munsi, gahunda nyinshi zakomezaga nk’ibisanzwe, ariko byaje guhinduka nyuma y’uko bigaragaye ko abantu benshi bakomeje kwandura muri iki gihugu, imikino bateganyaga ko ishobora kuba nta bafana bahari, ariko siko bimeze kuko igiye guhagarikwa imyinshi.

Umukino wagombaga guhuza Arsenal na Brighton kuri uyu wa gatandatu wamaze gusubikwa ndetse n’umukino wagombaga guhuza ikipe ya Chelsea na Aston Villa nawo ntabwo uri buze gukinwa.

Kuri uyu wa gatanu hategerejwe icyemezo kiraza gufatwa na Premier League ku mikino isigaye, ariko benshi barakeka ko shampiyona y’Abongereza iraza guhagarikwa mu rwego rwo kwirinda ko imikino yakomeza gukwirakwiza iki cyorezo.

Leicester City yemeje ko abakinnyi 3 bayo bamaze kwishyira mu kato kubera iki cyorezo cya Coronavirus, bakaba bahisemo kuguma mu rugo, mu gihe ikipe ya Man City nayo yemeje ko myugariro Benjamin Mendy yahisemo kwishyira mu kato, kuko bamwe mu bo mu muryango we, bagaragayeho iki cyorezo cya COVID-2019.

Imikino yari kuba mu cyumweru gitaha ihuza amakipe yabaye a ya mbere iwayo ku mugabane w’i Burayi yamaze guhagarikwa kubera iki cyorezo, harimo umukino wari guhuza Man City na Real Madrid (Abakinnyi b’iyi kipe bishyize mu kato nyuma y’uko hari umukinnyi wa Basketaball wa Real Madrid ugaragaweho iki cyorezo), Umukino wagombaga guhuza Juventus na Lyon, ndetse n’umukino wagombaga guhuza Barcelona na Napoli, kimwe n’u wa Bayern Munich na Chelsea.

Imikino ya NBA nayo yamaze guhagwarika , imikino ya Olempike nayo yari kuzabera mu buyapani nayo ishobora kwigizwa inyuma , na Euro nayo ishobora kuba yakwigizwa inyuma kubera iki cyorezo.

Leave a Reply

Your email address will not be published. Required fields are marked *

Kwirinda Coronavirus birashoboka!

Kwirinda kujya ahantu hateraniye abantu benshi no kwirinda ingendo zitari ngombwa ni bimwe mu byagufasha kwirinda kwandura #CoronaVirus. Siga metero 1 hagati yawe n'undi muntu cyane cyane urwaye inkorora cyangwa ibicurane Ibuka gukarana Intoki nibura hagati y'amasegonda 40 kugera kuri 60 igihe cyose ugize ikintu ukoraho!